سازمانی خهباتی کوردستانی ئێران
دەزگای قەزای ڕژیمی ئێران ڕایگەیاند کە حوکمی لەسێدارەدانی "عیرفان شەکوورزادە"، بە تۆمەتی هاوکاری لەگەڵ دەزگا هەواڵگرییەکانی ئەمریکا و ئیسرائیل جێبەجێ کراوە. ئەو ناوەندە سەرکوتگەرە ڕایگەیاند کە شەکوورزادە لە ڕێکخراوێکی زانستیی بواری ماهوارە چالاک بووە و زانیاریی نهێنیی ڕادەستی لایەنی بیانی کردووە.
بەپێی ڕاپۆرتی دەزگای قەزای ڕێژیم، ئەم لاوە لە سێ قۆناغدا پەیوەندیی بە "مووساد" و "سی ئای ئەی"وە کردووە، بەڵام ئەم ئیدیعایانە لەلایەن هیچ سەرچاوەیەکی سەربەخۆوە
ڕانەگەیندراوە و هیچ بەڵگەیەکی باوەڕپێکراویش لەمبارەیەوە بڵاو نەکراوەتەوە.
ئەمە لەکاتێکدایە کە پێشتر ڕێکخراوەکانی مافی مرۆڤ ڕایانگەیاندبوو کە عیرفان شەکوورزادە، تەمەن ٢٩ ساڵ، خوێندکارێکی بلیمەتی زانکۆی "عیلم و سەنعەت"ی تاران بووە.ناوبراو دوای چەندین مانگ ڕاگیران لە ژووری تاکەکەسی و وەرگرتنی "دانپێدانانی زۆرەملێ" لەژێر شکەنجەدا، حوکمی سێدارەی بەسەردا سەپێنرابوو.
