سازمانی خهباتی کوردستانی ئێران
سەرچاوە لوبنانییەکان هەواڵی هێرشی ئیسرائیلیان بۆ سەر زاحیەی باشووری بەیرووت
ڕاگەیاند. لەو وێنانەی بڵاوکراونەتەوە، دووکەڵ و شوێنەواری وێرانکاری لە یەکێک
لەو باڵەخانانەی کراونەتە ئامانج دەبینرێت و ڕاپۆرتگەلێکیش سەبارەت بە گواستنەوەی
بریندارەکان بڵاوکراونەتەوە.
بەپێی ئەو ڕاپۆرتانەی لە میدیا عەرەبییەکاندا بڵاوکراونەتەوە، درۆن و فڕۆکە
جەنگییەکانی ئیسرائیل پێش هێرشەکە لە ئاسمانی ناوچە لەوانە
غازییە، قەناریت، زەهرانی و سەیدا بینراون.
ڕادیۆی سپای ئیسرائیل ڕایگەیاندووە کە بەئامانجگرتنی زاحیەی باشووری بەیرووت دوای
هاویشتنی دوو ڕاکێت لە لایەن حیزبوڵڵاوە بەرەو شارۆچکە ئیسرائیلییەکان لە بەیانی
ئەمڕۆدا ئەنجامدراوە.
سپای ئیسرائیلیش ڕایگەیاندووە کە لەم هێرشەدا ژێرخانەکانی حیزبوڵڵا لە زاحیەی
باشووری بەیرووت کراونەتە ئامانج. نووسینگەی بنیامین ناتانیاهۆ، سەرۆکوەزیرانی
ئیسرائیل، ڕایگەیاندووە کە ئەم هێرشانە لە وەڵامی هاویشتنی ڕاکێتەکانی حیزبوڵڵادا
ئەنجام دراون.
