سازمانی خهباتی کوردستانی ئێران
نەخشەڕێگای ٦٠ ڕۆژە؛ ڕژێمی ئێران لەژێر چاودێریی توندی نێودەوڵەتیدا
وڵاتانی قەتەر و پاکستان، وەک نێوەندگیرانی سەرەکی، نەخشەڕێگایەکی نوێیان
بۆ گەیشتن بە ڕێککەوتنی کۆتایی لە نێوان ئەمەریکا و ڕژێمی ئێران ڕاگەیاند. بەپێی
ئەم لێکتێگەیشتنە کە لە "بۆرگنستۆک"ی سویسرا واژۆ کراوە، لایەنەکان ٦٠ ڕۆژیان
لەبەردەستە بۆ جێبەجێکردنی بەندەکان و پێکهێنانی لێژنەیەکی باڵای چاوەدێری.
========================
لە بەیاننامەیەکی هاوبەشدا، نێوەندگیرەکان ئاشکرایان کرد کە
گەڕی یەکەمی دانوستانە ئاست باڵاکان کۆتایی هاتووە و بڕیار دراوە لێژنەیەکی باڵا
سەرپەرشتیی پڕۆسەکە بکات. ئەم لێژنەیە لە چەند گرووپێکی کاری پێکدێت کە سەرنج
دەخەنە سەر سێ تەوەرەی هەستیار: "دۆسیەی ئەتۆمی، هەڵگرتنی گەمارۆکان، و
چارەسەرکردنی ناکۆکییەکان."
یەکێک لە خاڵە گرنگەکانی ئەم ڕێککەوتنە، دروستکردنی
"هێڵێکی پەیوەندیی ڕاستەوخۆیە" بۆ ڕێگریکردن لە هەر ڕووداوێکی نەخوازراو لە گەرووی
هورمز، تاوەکو دڵنیایی بدرێت لە تێپەڕبوونی ئارامی کەشتییە بازرگانییەکان؛ ئەمەش
وەک وەڵامێکی دیپلۆماسی بۆ ئەو گرژییانە دێت کە لە چەند ڕۆژی ڕابردوودا لەو
ناوچەیە دروست ببوو.
هەروەها، ڕژیمی ئێران و ئەمریکا لەسەر پێکهێنانی "ناوەندێکی کەمکردنەوەی گرژییەکان" لە
لوبنان ڕێککەوتوون، بە مەبەستی مسۆگەرکردنی پابەندبوونی هەردوولا بە
کۆتاییهێنان بە ئۆپەراسیۆنە سەربازییەکان لەو وڵاتەدا.
ئەم دانوستانانە کە بڕیارە تا کۆتایی ئەم هەفتەیە لە سویسرا بەردەوام بن،
وەک هەوڵێکی نێودەوڵەتی دەبینرێن بۆ کۆنترۆڵکردنی ئاڵۆزییەکان. چاودێران پێیان
وایە ئەم نەخشەڕێگایە ڕژێمی ئێرانی خستووەتە ژێر چاودێرییەکی توندی
نێودەوڵەتییەوە، کە تێیدا هەر هەنگاوێکی ڕژیمی ئێران لەژێر وردبینیی لێژنە
باڵاکەدا دەبێت و مەودای مانۆڕی سەربازی و ئەتۆمیی ڕژێمەکەی بۆ کەمترین ئاست
دابەزاندووە.
